أديب شعبي يعد خاطرة أدبية للتصدي لوباء كورونا

الكاف:

يَلِّ تبقِ لهلْ أُولحبَابْ @ أعلَ “كُورُونَا” وَعِّيهمْ،

واحكَمْ بلَّكْ عنهم فاسبابْ @ ما يَعدُوكْ أُولاَ تَعدِيهمْ

الطلعة الأولى:

كُورُونَا فيرُوس أُوفَتَّاكْ @ والعَدْوَ فيهْ أبْلَحتِكَاكْ

طَبُّ فالتّعلِيماتْ أيَّاكْ @ جُهُود الدَّوْلَه تُوفيهم

كِيفَتْ لَهْنَ فالدَّار أُوذَاك @ خَوْفْ أهلَك يَتْفَشَّ فيهم

الطلعة الثانية:

الوِقايَه باصْگِيلْ أيْدِيكْ @ بَالْمَ والصّابُون إِجَازِيكْ

والمُصَافَحَه مَاهْ أعلِيكْ @ والتّجَمُّعَاتْ الْغِيهم

وَالتَّبَاعُدْ تَطبِيقُ فِيكْ @ وَخُّوتَكْ لاَزَمْ تُقِيهم

الطلعة الثالثة:

الدّوْلَه گَبْظَتْ ذَهِيَّ @ إِجْرَاءَاتْ أَحتِرَازِيَّ

-ثَابَتْ عَنْهَ ضَرُورِيَّ- @ وَابْلِعَانَاتْ أتْوَازِيهم

وَامْعَ ذَاكْ الشّفَافِيَّ @ فاللِّجَانْ أُوتَعَاطِيهم

الطلعة الرابعة:

مشكُور الرئيس الْهُمَامْ @ وَالحُكُومَ زَاد الْگَدَّامْ

وَالجيش أُولَمْنْ أمْعَ لِعْلاَمْ @ وَاهْلْ الصِّحَّه يَالْيَحْمِيهم

وَلِّ مَنْ حَدْ أتْبَرَّعْ تَامْ @ وَالنُّخَبْ فَرْ إِجَازِيهم

الكاف:

يَلِّ تبقِ لهلْ أُولحبَابْ @ أعلَ “كُورُونَا” وَعِّيهمْ،

واحكَمْ بلَّكْ عنهم فاسبابْ @ ما يَعدُوكْ أُولاَ تَعدِيهمْ.

الأستاذ محمد ولد أصوينع